|
|
Föstudaginn 25. nóvember fer fram skáldakynning í Kaupvangi og hefst kl. 20:00. Þau skáld sem lesa þar úr verkum sínum eru:
Allir hafa þessir höfundar sent frá sér bækur á árinu.
Gerður Kristný sendir frá sér bókina "Myndin af pabba" sem segir sögu Thelmu og fjögurra systra hennar, en þær ólust upp í Hafnarfirði á sjöunda og áttunda áratugnum. Faðir þeirra beitti þær kynferðislegu ofbeldi jafnframt því sem hann leigði öðrum barnaníðingum aðgang að þeim. Þessi bók hefur vakið gríðarsterk viðbrögð í samfélaginu.
Þess má geta að Gerður Kristný hlaut Bókmenntaverðlaun Halldórs Laxness árið 2004 fyrir bók sína "Bátur með segli og allt".
Nánari upplýsingar um Gerði Kristnýju og rithöfundarferil hennar er að finna á vef útgefanda hennar, Vöku-Helgafells sem er hluti af Eddu útgáfu.
Yrsa Sigurðardóttir skrifar þetta árið glæpasögu, "Þriðja táknið", en hingað til hefur hún mest skrifað vinsælar barnabækur; þar á meðal "Við viljum jólin í júlí" sem kom út 1999 og hlaut viðurkenningu íslandsdeildar IBBY samtakanna auk tilnefningar til Barnabókaverðlauna Reykjavíkur.
Í "Þriðja táknið" segir morði á þýskum sagnfræðinema sem vinnur að samanburði á galdrafári 17. aldar í Evrópu og á Íslandi. Fjölskylda hins látna er ekki sátt við rannsókn lögreglunnar og fær ungan íslenskan lögmann, Þóru Guðmundsdóttur til að kanna málið.
Frekari upplýsingar um Yrsu má finna á vef Eddu útgáfu.
Gunnar Hersveinn hefur gefið út bókina "Gæfuspor" en þar fjallar hann um mannkosti og tilfinningar, stríð og frið og hamingju og rósemd og varpar í bók sinni nýju ljósi á rótgróin hugtök. Í bókinni leggur hann áherslu á mikilvægi þess að rækta tilfinningar sínar enda sé það ein af grunnforsendum fyrir velferð hvers einstaklings í lífi og starfi.
Gunnar Hersveinn hefur áður gefið út ljóðabækur, ættfræði, leikrit og heimspekirit auk fræðilegs efnis. Þá hélt hann um árabil úti siðfræðipistlum í sunnudagsblaði Morgunblaðsins auk fjölda greina í blöð og tímarit.
Fjallað er um höfundarferil Gunnars Hersveins á vef útgefanda hans, JPV-Útgáfu.
Jón Kalman hóf feril sinn sem ljóðskáld en hefur á undanförnum árum skrifað prósaverk og nú kemur frá honum bókin "Sumarljós og svo kemur nóttin" þar sem sögusviðið er smáþorp á Vesturlandi. Lesandinn er að vísu ekki leiddur hús úr húsi en fær að frétta af hversdagslegum atburðum en líka af þeim sem eru ofvaxnir skilningi okkar; eitt er víst að þetta verða ákaflega margar sögur svo vitnað sé í umfjöllun um bókina á vef útgefandans.
Tvær af bókum Jóns hafa verið tilnefndar til Bókmenntaverðlauna Norðurlandaráðs, "Sumarið bak við brekkuna" og "Ýmislegt um risafurur og tímann". Auk frumsamins efnis hefur Jón þýtt úr Norðurlandamálum til útgáfu hjá forlagi sínu.
Frekari upplýsingar má finna á vef forleggjara Jóns Kalman sem er Bjartur forlag.
Guðlaugur Arason hefur skrifað skáldsögur sem þjóðin þekkir og nægir að nefna "Eldhúsmellur" og "Pelastikk" Að þessu sinni skrifar hann nokkurskonar ferðafélaga fyrir þann sem vill kynna sér gömluhöfuðborgina okkar, Kaupmannahöfn.
Í bókinni "Gamla góða Kaupmannahöfn" segir Guðlaugur frá mannlífi og mannvirkjum að mestu innan gömlu borgarmúranna og bregður upp lifandi myndum af atburðum og fólki. Þetta eru hinar gömlu Íslendingaslóðir í Höfn þar sem margir af efnilegustu sonum íslensku þjóðarinnar fóru lóðrétt í hundana og enduðu sumir ævina í síkjum borgarinnar. Hér var einnig miðstöð mennta íslendinga og sjálfstæðisbaráttan hófst hér með Jóni Sigurðssyni; handritin okkar bjuggu hér og brunnu og svo mætti lengi telja. Borgin við sundin er svo sannarlega nátengd sögu og menningu Íslendinga.
Guðlaugur þekkir borgina náið, hefur búið þar um árabil og veitt leiðsögn um stræti hennar og torg. Salka bókaútgáfa dreifir bókinni og er fjallað umhana á vef útgáfunnar.
|
 |
|
